Rais wa Ufaransa Emmanuel Macron alikataa kufanyiwa vipimo vya Covid nchini Urusi kabla ya mkutano wake na Rais Vladimir Putin wa Urusi, Kremlin imethibitisha.
Uchunguzi huo ulihitaji itifaki ya afya ambayo haikubaliki na haiendani na ratiba ya kiongozi huyo wa Ufaransa, chanzo cha Ufaransa kiliambia BBC.
Hatua hiyo inafuatia ripoti kwamba Macron alikataa kipimo cha PCR kwa hofu kwamba Warusi wangepata DNA yake.
Viongozi hao baadaye walifanya mkutano huku wakiwa wamekaa mbali kijamii siku ya Jumatatu.
Hawakusaliamia kwa mikono na kukaa na meza yenye urefu wa mita nne kati yao, huku waangalizi wakishangaa iwapo Putin alikuwa akiitumia njia hiyo kutuma ujumbe wa kidiplomasia.
Lakini vyanzo vya kidiplomasia vya Ufaransa viliiambia Reuters kwamba Bw Macron alikuwa ameambiwa achague kati ya kukubali vipimo vya PCR vya Urusi ili kuwa karibu na Putin au kutii sheria kali za kukaa mbalimbali.
Tulijua vizuri kwamba hatua hiyo ilimaanisha kwamba hakutakuwa na kusalimiana kwa mkono katika meza hiyo ndefu. Lakini hatukubali waweze kupata DNA ya rais, moja ya vyanzo hivyo aliambia Reuters.
Chanzo hicho hakikuelezea jinsi huduma hiyo ya ujasusi wa Urusi ingetumia DNA ya bwana Macron.
Msemaji wa Kremlin Dmitry Peskov amesema kwamba Urusi inaelewa uamuzi huo wa Ufaransa na haikuathiri mazungumzo.
#ChanzoBBC
