Idadi ya vifo vilivyosababishwa na mafuriko yalioambatana na kimbunga Idai imeongezeka na kufikia watu 217 huku takriban watu 15,000 wakihitaji huduma za uokozi.

 Waziri wa ardhi na mazingira wa Msumbiji Celso Correia amesema hii leo kwamba watu 3,000 tayari wamekwishaokolewa. Wafanyakazi wa kutoa misaada walipambana kuwasaidia manusura lakini pia kuwafikishia misaada ya kiutu nchini Zimbabwe, Malawi na Msumbiji ambazo zimeathiriwa pakubwa na kimbunga hicho. Baadhi ya vyombo vya habari vinaripoti kwamba zaidi ya watu 300 wamefariki kutokana na janga hilo ikiwa ni siku tano baada ya kimbunga hicho Idai kupiga eneo kubwa la Zimbabwe na Malawi. Kimbunga Idai kilianza kwa kuupiga mji wa bandari wa Beira nchini Msumbiji Alhamisi iliyopita na kisha kuelekea nchini Zimbabwe na Malawi na kusababisha uharibifu mkubwa wa majengo na kuyaweka hatarini maisha ya maelfu ya wakazi.

Chanzo: kutoka Idhaa ya Kiswahili ya DW