Wanafunzi wawili wa Shule ya sekondari ya Wasichana ya Buruburu nchini Kenya wamefikishwa mahakamani leo Jumatatu kuhusiana na kisa cha moto katika shule hiyo kilichotokea wiki iliyopita na kusababisha wanafunzi 59 kulazwa hospitalini.
Wawili hao wanadaiwa kupanga na kuchoma moja ya bweni mnamo Oktoba 31 kabla ya kutoroka na kuwaacha wenzao wakiwa ndani, Citizen Digital imeripoti.
Wakati huo huo, Waziri wa Elimu George Magoha ameonya kwamba wanafunzi wote wanaohusika katika tukio la uchomaji shule watakabiliwa na mkono wa sheria.
Kikao kati ya Bodi ya Menejimenti na Jumuiya ya Wazazi na walimu kiliazimia mambo kadhaa ambayo ni pamoja na uwekaji wa kamera za CCTV shuleni hapo, milango ya kutokea ya dharura iliyofunguliwa moja kwa moja kwenda nje ili ifanye kazi na kukaguliwa mara kwa mara ili kuimarisha ulinzi na usalama shuleni hapo.
