Tume ya uchaguzi nchini Misri imetangaza leo kwamba kura ya maoni kuhusu mageuzi ya katiba ikiwemo uwezekano wa kumruhusu rais Abdel-Fatah al sisi kubakia madarakani mpaka mwaka 2030,itafanyika Aprili 20-22.

Umoja wa Afrika umetishia kuisimamisha Sudan kufuatia mapinduzi ya wiki iliyopita yaliyoshuhudia Omar al-Bashir akiondolewa madarakani na jeshi. Katika taarifa yake Baraza la Amani na Usalama la Umoja wa Afrika, limesema ikiwa jeshi litashindwa kukabidhi madaraka kwa raia ndani ya siku 15, basi Umoja wa Afrika utasitisha ushiriki wa Sudan katika shughuli zote za Umoja huo hadi pale amri ya kikatiba itakaporejeshwa.

Rais aliyeondolewa kwa nguvu madarakani nchini Sudan Omar al-Bashir amehamishiwa katika jela ya Kobar iliyopo kwenye mji mkuu wa nchi hiyo Khartoum. Taarifa hiyo imetolewa na duru mbili za familia.

Mkuu mpya wa baraza la kijeshi mpito nchini Sudan amesema leo kuwa serikali ya kiraia itaundwa baada ya mashauriano na makundi ya upinzani na kuahidi kuwa kipindi cha mpito kitadumu kwa muda usiozidi miaka miwili.