Star Tv

Kesi inayomkabili Onesmo Machibya anaefahamika kwa jina ‘Nabii Tito ‘ya kujaribu kujiua imeahirishwa hadi March 19, 2018. Hakimu anayesikiliza kesi hiyo, James Karayemaha aliagiza mtuhumiwa huyo kuchukuliwa vipimo vya akili yake ili kujua kama ana matatizo ya akili katika taasisi ya magonjwa ya akili ya Isanga mjini Dodoma.

Add a comment

Kesi inayomkabili Muigizaji Wema Sepetu imeendelea ambapo Ofisa wa Polisi WP Marry ameieleza Mahakama ya Hakimu Mkazi Kisutu kuwa Wema alimwambia anatumia Dawa za kulevya aina ya Bangi kama starehe na sio kwaajili kuuza.

Add a comment

Wakurugenzi Watendaji wa Kampuni nne wamefikishwa Mahakama ya Hakimu Mkazi Kisutu wakikabiliwa na makosa ya kutojisajili na kupeleka taarifa za wafanyakazi wao katika Mfuko wa Fidia kwa Wafanyakazi ( WCF). Wakurugenzi hao ni Abshir Gure na Farhiya Wrsame (Kampuni ya Lasar Logistic Limited), Joseph Alexander (Kamanda Security Guards Co.Ltd). Pia Riziki Shemdoe na Deusdedit Kibassa (Kampuni ya ENCC Consultants) na Mallakhara Semis na Shafeek Purayil (Kampuni ya Spash International Co.Ltd). Washtakiwa hao wamesomewa mashtaka yao mbele ya Hakimu Mfawidhi, Victoria Nongwa na Mawakili tofauti akiwemo Emmil Kilia. Akisomewa mashtaka yake, Joseph wa Kampuni ya Kamanda Security Guards Co.Ltd anadaiwa kuwa January ,26,2018 walishindwa kujisajili na kutoa taarifa muhimu za shughuli zake kwa WCF. Kilia amedai katika kesi hiyo namba 34 ya 2018 mshtakiwa huyo alishindwa kutoa taarifa muhimu za wafanyakazi wake kwa afisa aliyeteuliwa na Mkurugenzi Mkuu wa WCF. Ilidaiwa January 11,2018 mshtakiwa huyo alishindwa kutoa taarifa muhimu za waajiriwa wake ikiwamo majina na mishahara ya wafanyakazi. Mshtakiwa Malakhara Semis na Shafeek Purayil wa kampuni ya Spash International Co.Ltd wamesomewa mashtaka yao na Wakili wa Serikali Mwandamizi, Benson Mangowi ambapo amedaili December 25,2017 washtakiwa walishindwa kusajili. Pia walishindwa kutoa taarifa muhimu za wafanyakazi wao kwa Afisa aliyeteuliwa na Mkurugenzi Mkuu wa WCF ambapo September 6,2017 washtakiwa hao walishindwa kutoa taarifa muhimu za wafanyakazi ikiwamo majina na mishahara. Mshtakiwa mwingine Abshir Gure na Farhiya Warsame wamesomewa mashtaka yao na wakili wa Serikali, Emma Msofe ambapo amedai November 3,2017 walishindwa kusajili na kupelekwa taarifa muhimu kwa Mfuko wa WCF. Amedai kuwa October 19,2017 walishindwa kutoa taarifa muhimu zikiwamo majina na mishahara. Hata hivyo, mshtakiwa Riziki Shemdoe na Deusdedit Kibassa wa kampuni ya ENCC wameshindwa kusomewa mashtaka yao kwa sababu hawakuwepo mahakamani kutokana na kupata udhuru. Katika kesi hizo, upande wa mashtaka umeeleza kuwa upelelezi wa kesi hizo umekamilika. Hakimu Nongwa alimtaka kila mshtakiwa kuwa na wadhamini wawili ambapo kila mdhamini atasaini ahadi ya Shilingi Milioni 50. Washtakiwa hao walitimiza masharti ya dhamana na kuachiwa. Add a comment
Mahakama ya Hakimu Mkazi Mbeya imemhukumu miezi mitano jela Mbunge wa Mbeya Mjini (CHADEMA), Joseph Mbilinyi maarufu kama ‘Sugu’. Sugu amehukumiwa pamoja na Katibu wa CHADEMA Kanda ya Nyanda za Juu Kusini, Emmanuel Masonga baada ya kutiwa hatiani kwa kosa la kutumia lugha ya fedheha dhidi ya Rais John Magufuli. Hukumu hiyo imetolewa na Hakimu Mkazi Mfawidhi, Michael Mteite ambapo amesema ameridhishwa na ushahidi wa upande wa mashtaka. Add a comment
Waziri wa Mambo ya Ndani ya Nchi Mwigulu Nchemba amewataka wanasiasa kuacha kutumia kesi ya kuumwa kwa Mbunge wa Singida Mashariki Tundu Lissu kama chambo ya kisiasa katika majukwaa. Dr. Mwigulu aliyasema hayo February 13, 2018 mkoani Singida wakati wa kampeni za udiwani katika kata ya Mitunduluni. Amewataka waache kutumia matatizo ya ndugu yao kama mitaji ya kisiasa baadala yake waje na hoja za maana za kusaidia katika maendeleo ya nchi. Aliongeza kusema kuwa mwaka uliopita uhalifu wa ajabu ulitokea ambapo kuna watoto wadogo wa chekechea walitekwa na kuuwawa na wazazi wao ni watu wa kawaida kabisa na kuhoji kama serikali pia imehusika kwenye hilo. “Sisi tunaoshughulika na maswala ya uhalifu tunatafuta wahalifu wanaofanya maswala ya kihalifu, kuna watu wanaona ni agenda ya kisiasa wakati sisi tuombea mtu apone.” Dr. Mwigulu ameongeza kwa kusema kuwa je angeamua kuendelea kusema kuhusu kupigwa risasi kwa mwanajeshi masaki ina uhusiano gani na shida za kata ya mitundulini, hivyo wananchi wa Singida wawaadhibu kwa kuwanyima kura katika uchaguzi wa tarehe 17 mwezi huu. Add a comment
Maafisa wa forodha nchini Kenya wamemkamata mwanamume anayedaiwa kuwa raia wa Tanzania katika uwanja wa kimataifa wa ndege wa Jomo Kenyatta, Nairobi akisafirisha dhahabu ya thamani ya dola milioni moja, taarifa zinasema. Mwanamume huyo mwenye umri wa miaka 46 anadaiwa kuwasili kutoka Mwanza, Tanzania kupitia uwanja wa Kilimanjaro na alikuwa safarini kuelekea Dubai. Gazeti la kibinafsi ya Nation linasema mwanamume huyo, ambaye jina lake halijafichuliwa kufikia sasa, aliwasili uwanja wa JKIA Ijumaa 16 Februari akiabiri ndege ya Precisio Airlines na alitaka kuabiri ndege ya Kenya Airways kuelekea Dubai. Maafisa wa uIdara ya Uchunguzi wa Jinai wakiandamana na maafisa wa uchunguzi kutoka Mamlaka ya Mapato ya Kenya (KRA) walimhoji na akaandikisha taarifa. Add a comment
Katibu wa kata ya Hananasifu Kinondoni (CHADEMA) amefariki kwenye mazingira yenye utata baada ya mwili wake kukutwa na jeraha la panga kichwani na sehemu nyingine ya mwili. Mwenyekiti wa CHADEMA Freeman Mbowe amelizungumzia tukio hilo na kusema Chama kinatoa taarifa za awali kuhusiana na msiba huu, hili ni jambo la ghafla hata ndugu wengine wa Marehemu bado hawajajua. “Tunawaambia Wanachama wetu waendelee kuwa waangalifu wasitembee mmojammoja kati ya sasa mpaka siku ya Uchaguzi watembee kwa vikundi na wajiweke katika mazingira ya kujilinda wakati wote” “Tangu taarifa hizi zimetolewa kwa jeshi la polisi na Viongozi wetu, zilitolewa sambamba na taarifa za mtu kupotea na kwamba aliyepotea alichukuliwa na Land Rover nyeupe na watu waliojifanya ni Jeshi la Polisi lakini tangu wakati huo hakuna taarifa yoyote ya jeshi la Polisi ya kiuchunguzi na hata kwenda kuukuta mwili ule Muhimbili tumeukuta sisi kwa jitihada zetu lakini polisi hawakutoa taarifa wameokota mwili Coco beach” “Taarifa kwamba mwili umeokotwa maeneo ya Oysterbay ukiwa na majeraha ukapelekwa polisi tumekuta yamejazwa kwenye kitabu cha Muhimbili, lakini polisi tulipokwenda kutoa hizo taarifa walisema hawana taarifa za mtu yeyote kupotea wala hawajua chochote kuhusu jambo hili kumbe wao ndio wamepeleka mwili polisi” Add a comment
Maafisa wa polisi mjini Dar es Salaam wamewataka viongozi wakuu wa chama cha upinzani nchini humo Chadema kufika mbele yake ili kuhojiwa kutokana na kifo cha mwanafunzi wa chuo kikuu cha usafirishaji nchini humo Akwilina Akwiline. Bi Akwiline alifariki baada ya kupigwa risasi kimakosa wakati wa maandamano ya viongozi wa chama hicho yaliotibuliwa na maafisa wa polisi siku ya Ijumaa. Mauaji hayo kwa sasa ndio swala linalozungumziwa sana nchini Tanzania huku raia kupitia mitandao tofauti ya kijamii wakishutumu kisa hicho. Kulingana na gazeti la The Citizen nchini humo, taarifa kutoka kwa mkurugenzi wa itifaki ,mawasiliano na maswala ya kigeni John Mrema ilisema siku ya Jumatatu kwamba kiongozi wa uchunguzi wa eneo maalum la Dar es Salaam aliamrisha viongozi saba wa chama hicho kuripoti katika afisi yake ili kuhojiwa. Orodha ya wale waliotakiwa kuripoti ni pamoja na mwenyekiti wa chadema Freeman Mbowe, katibu mkuu Vincent Mashinji na naibu katibu mkuu wa chama hicho wa Tanzania bara John Mnyika. Wakati huohuo wakaazi wa mji wa Dar es salaam wataupungia mkono wa buriani mwili wa msichana huyo katika uwanja wa taasisi ya NIT siku ya Alhamisi kabla ya mazishi yake yanayotarajiwa kufanyika katika eneo la Rombo Kilimanjaro siku ya Ijumaa. Wakati huohuo ripoti ya upasuaji imesema kuwa bi Akwilina alifariki kutokana na shambulio la risasi katika kichwa chake. Kulingana na gazetila The Citizen Tanzania Familia ya mwanafunzi huyo ilithibitisha kuwa ilipatiwa ripoti ya matokeo hayo iliofanywa katika hospitali ya Muhimbili. Ripoti hiyo inaonyesha kuwa risasi hiyo iliingia kichwani kupitia upande wa kushoto na kutoka na upande wa kulia....'''alijeruhiwa vibaya'' , alisema nduguye marehemu bwana Festo Kavishe. Aliongezea kuwa familia ilitosheka na ripoti hiyo na sasa inakamilisha maandalizi ya mazishi yake. ''Ningependa kusema kuwa tumetosheka na ripoti iliowasilishwa mbele yetu , kile tulichotaka ni picha kamili ya vile alivyouawa''. Akwilina alifariki siku ya Ijumaa baada ya kupigwa risasi alipokuwa ndani ya daladala. Kulingana na ripoti za mapema ni kwamba maafisa wa polisi walikuwa wakijaribu kuwatawanya waandamanaji kwa kile walichokitaja kuwa maandamano haramu yaliofanywa na Chadema wakati ambapo risasi hiyo ilipita katika kioo cha nyuma cha daladala na kumpiga kichwa. Kwa hisani ya BBC Add a comment
Jalada la kesi inayomkabili Mhasibu Mkuu wa (TAKUKURU), Godfrey Gugai anayedaiwa kumiliki mali zenye thamani ya Sh. Bilioni 3 ambazo haziendani na kipato chake limepelekwa kwa Mkurugenzi wa Mashtaka (DPP) kwa ajili ya kulipitia na kulitolea maamuzi. Hayo yameelezwa na Wakili wa Serikali, Wankyo Simon mbele ya Hakimu Mkazi Mkuu, Thomas Simba wakati shauri hilo lilipokuja kwaajili ya kutajwa. Wankyo alieleza awali jalada hilo lilipelekwa kwa DPP ambapo alilipitia na kulirejesha TAKUKURU na kuelekeza baadhi ya maeneo yafanyiwe uchunguzi zaidi. Alidai kuwa maeneo hayo yamekwisha fanyiwa kazi na jalada limerejeshwa tena kwa DPP kwa ajili ya kulipitia na kulitolea maamuzi. Wankyo baada ya kuyaeleza hayo aliiomba Mahakama iipangie kesi hiyo tarehe nyingine ili waweze kueleza hali ya upelelezi ikoje. Kwa upande wa mshtakiwa Gugai alidai kuwa sasa wamefikisha siku 90 hivyo anaomba kesi ipangiwe siku saba ili waweze kujua hali ya upelelezi ikoje. Baada ya kueleza hayo, Hakimu Simba aliiahirisha kesi hiyo hadi February 21,2018 na kuutaka upande wa mashtaka uhakikishe wanalifanyia kazi jalada hilo kwa kuwa limeanza kuzeeka. Mbali na Gugai, washtakiwa wengine katika kesi hiyo ni George Makaranga, Leonard Aloys na Yasini Katera Washtakiwa hao wanaokabiliwa na mashtaka 43 yakiwemo 20 ya utakatishaji fedha haramu, kumiliki mali zisizoendana na kipato na kughushi mikataba ya mauziano ya viwanja katika maeneo mbalimbali. Add a comment

Latest News

Mwanafunzi apoteza maisha, baada ya kutumbukia kisimani.
17 Sep 2019 10:27 - Kisali Shombe

Mwanafunzi mmoja Matutu Mashini (7) aliyekuwa anasoma darasa la kwanza katika shule ya msingi Salama A, iliyoko katika  [ ... ]

Rais Magufuli atengua uteuzi wa Mkuu wa Wilaya na Mkurugenzi wa Halmashauri ya W...
17 Sep 2019 10:02 - Kisali Shombe

Rais wa Jamhuri ya Muungano wa Tanzania, Mhe. Dkt. John Pombe Magufuli ametengua uteuzi wa Mkuu wa Wilaya ya Malinyi Mko [ ... ]

Nape Nnauye akutana na Mhe. Rais Magufuli, amuomba radhi.
10 Sep 2019 11:44 - Kisali Shombe

Mbunge wa Jimbo la Mtama Mkoani Lindi, Mhe. Nape Nnauye amekutana na kumuomba radhi Rais wa Jamhuri ya Muungano wa Tanza [ ... ]

Other Articles

Social Media

Copyright © 2019 . Star Tv - Tanzania. All Rights Reserved.